“الا ياشارةً ركزت ” كلمات الشاعر عبدالله آل جمان




الا ياشارةً ركزت على رجمٍ ماهو ببعيد
نصوب صوبها نرمي ولكن ماكسبناها

على الرغم ان بنادقنا عن الشاره ماهي بتحيد
ولا نقنى يا كود اللي تجمل لا سحبناها

هقاوينا جزال ونقصد النادر بلى تحديد
ولا يخلف هقاوينا عزاوين ماطلبناها

ترى قول الفتى دينن عليه وياجب التسديد
هروج الخبل واقوال الهلايم مارقبناها

ترى ماكل طلقه طايشه عبرودها مايصيد
لذا كم طلقتن طاشت وفالمرمى حسبناها

نحاول نمسح الزله ولكنّ الخطا بيزيد
نحاول نجذب السبّه ولكن ماجذبناها

لذا ماعاد لي فيها مطامع دام مابه فيد
مادام انه حسدها راكز الشاره جنبناها

الا ياراعي الفكر المدقق لا تروح بعيد
ترى الجره دهمناها ترى الشاره نسبناها

بعيداً ناوي الرحله بشد شداد واقطع قيد
واسوق ركابنا صوب القصور الي نصبناها

على ساساً متينن نبني القصر الذي بنشيد
ولا نبني ولا نسكن بيوتن مارغبناها

قصورن تحتها نخلن عذوقه تفتنك وتزيد.
تشوق العين وتزيد الفخر لاما قربناها

عساها تعوضنا في نخْلنا الي يابسات جريد
غزاها الدّهْر واضماها وان اسقينا نكبناها

ألا يانخْلِنا اللي قسمنا منّك بقايا الصيد
ترانا مارقبنا تمرتك ولا حسبناها

الشاعر/ عبدالله سعيد ال جمان

2 التعليقات

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح