وا قلب ياللي لاهب الهم يكويه
كيّ المداوي فوق ضيم الترايب
****
من ذاالشباب اللي سلك سكك التيه
باارض الوطن شبوا شبوب الحرايب
****
هدوا جدار العز والناس تبنيه
صاروا للاعداء مثل ذيك الجلايب
****
عدو الامه حقق اكبر مناويه
يبغى الأمن والخير يصبح نهايب
****
استخدم أيدينا تخرب عن إيديه
شوش على أفكار الشباب الزلايب
****
طغمة فساد تبغي الشر تشريه
بنفوسهم صاروا علينا عقايب
****
من الوطن شبعوا ونسيوا حسانيه
قاموا يجيبون العلوم الغرايب
****
ياشلة التخريب تخسون نحميه
درع الوطن حنا جيوش وكتايب
****
الموت من دون الوطن حيل نغليه
يامرحبا به كان هبت هبايب
****
يامرحبا بالموت نادى مناديه
والقبر جاهز ما بقى الا النصايب
****
للنفس ميعادٍ مع الحق تبغيه
ندفع بالأنفس فدوةٍ له ضرايب
****
وان شاش ابو فهد ونادى نلبيه
يبشر بِنَا من فوق عوص النجايب
****
حن محزمه فالضيق ندحر معاديه
نسقيه مر الكأس ويعود خايب
****
يفداه من بالشين بارة هقاويه
يمسي ويصبح فوق كبده لهايب
****
ياعل رب البيت بحماه يحميه
ابن الكرام مطوعين الصعايب
****
ريف الضعيف اللي شكاله بلاويه
غيث على الاجواد وبله سكايب
****
وختامها ياالله ياللي نلبيه
يامنشي بالخير وبل السحايب
****
الأمن فوق الدار طالبك تضفيه
وافضح عداه مدورين النشايب
****
محمد بن مسرع آل سلمان
التعليقات 2
2 pings
مبارك بن ناصر بن نوره الحرقان
09/05/2016 في 3:26 ص[3] رابط التعليق
صح لسانك وبيض الله وجهك
ولاهي غريبه
ربعي الحرقان في يوم العزاوي
يكفي ان الاتراك فرت من عزاها
ربعي الحرقان في الخبت المسمى
الرجال اللي تنومس من نصاها
حفض الله بلادنا من كل سوء ومكروه وسائر بلاد المسلمين
(0)
(0)
محمد الجـــــــابري
09/05/2016 في 3:46 م[3] رابط التعليق
ابيض وجه .. وصح لسانك وطاب فالك
جزلة رائعة من شاعر رائع ويستاهل ابو فهد الاشادة
التغني بالشجاعة من سمات “الحرقان”والتاريخ يختزن امجادهم
من ابن عمير الى ابن غيدة في حق الخوي وافعال راعي “المسماة”
تحياتي/ راس قرناس
(0)
(0)