قصيدة للشاعر زيد بن وازع الظلافيع



الرأي - طريب

عزّي لمن يجمع لغيره ولا ذاق
مما جمع ياكود هم وغبينه

****

نفسه محملها حمولٍ ماتنطاق
ومن الصلف بتقول عنده قرينه

****
وتحصّله باللي تحت سلطته شاق
وكن الابتسامه خلف سنّه رهينه

****
تعلمه صكات بقعا ولا فاق
كنها تقول اللي ينافسك وينه

****
يامخبل اللي قال للوقت لحّاق
مايدري ان الاقدار بأعلى جبينه

****
الارزاق يامرزوق في كف رزّاق
والموت حق وجاي لكن ب حينه

****
خلّ الطموح يعانق سقوف الآفاق
وخل القناعه خير ذخر وخزينه

****
وترا الهمم شقّت مع الشامخ انفاق
واللي يبي الطالات ربي يعينه

****
والكبر ماهو من قيمنا والاخلاق
وآدم ابونا في الاصل كان طينه

****
ولا تخاوي المطفوق وتماشي العاق
يبور من لا بر في والدينه

****
والبال لا منّه تعومس ولا راق
زر مكه وحاول تزور المدينه

****
واضحك ولا تحزن ترا الكون ماضاق
ماتهتني بالعيش نفسٍ حزينه

****
واياك تكشف عيب من دونه رواق
الاسرار خلها جوف صدرك دفينه

****
وخوك لاجا بينك وبينه شقاق
حذرا تجيب اجناب بينك وبينه

****
بعض البشر بين العرب شغله نفاق
هذا عدوّ الصلح ماهو عوينه

****
ذكّره باللي للمخاليق خلاّق
ولا تطالبه و تغانم ب دينه

****
اخوك سيفك كان يبسنّ الارياق
ادمح له وعقبالها تجيك زينه

****
بكره بعد ماطال لقياكم فراق
وتذكر زمان فات تبكي سنينه

****
ولا تعرّض لحيتك كل حلاق
وتسمع كلام الناس زينه وشينه

****
ولا تطيع النفس لا لاح برّاق
راعى الهوى تصفق يساره يمينه

****
وان شفت ربعك خيلها يمّك سباق
خلّك حكيم الراي نفسك رزينه

****
كم فاسق كلمته تبزا ب معلاق
والصبح تكبر من. بزاها تهينه

****
وليا جفتك الديره الزّمل تنساق
وقبل ان تحلّ بدار شف من قطينه

****
وصلوا عدد ما ينكتب وسط الاوراق
واعداد ما تنسج سلوك المكينه

****
على اللذي كلٍ على شوفته تاق
هو خير خلق الله ختم مرسلينه

****
اختار بن وازع من الفكر مالاق
ومن خلقته ماجاب غير الثمينه

****

زيد بن وازع الظلافيع القحطاني


4 التعليقات

إنتقل إلى نموذج التعليقات

    1. 1
      جبران حسين ال راضي

      صح لسانك ابيات جزله من شاعر جزل.

      (0) (1) الرد
    2. 2
      عائض بن فهد ال كدم

      بيض الله وجهك وجمل الله حالك وصح السانك .
      ولا تطيع النفس لا لاح برّاق
      راعى الهوى تصفق يساره يمينه

      (0) (1) الرد
    3. 3
      سعد مرزوق

      الارزاق يامرزوق في كف رزّاق
      والموت حق وجاي لكن ب حينه

      صح بدنك ،، متى نشوفك في نجد

      (0) (1) الرد
    4. 4
      فهد الظلافيع

      صح لسانك يابو عساف وانت خير من يمثل قبيلته في هذا المجال
      نتطلع الجديد دايما متمنيين لك التوفيق

      (0) (1) الرد

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح