قصيدة للشاعر ناصر بن شتوي آل عمران



الرأي - مضواح بن شتوي - الرياض

حلفت ماشره على الاقصى ولا الومه
واقرب قريبٍ تعاداني وخلاَّني

****

وفي مبتداء القاف والابيات منظومه
بشره على الربع والاقراب من داني

****

ردو على المخطي المغرور من يومه
لو كان انا رجَّعوني وانتو اخواني

****

تروا التمادي يزيد الجرح بسهومه
وبكره يعم الخطأ شخصٍ تناساني

****

خاب الأمل والسنين الغبر مشؤومه
والوضع كنَّه على ماقيل هجاني

****

كان القبايل سواء في طيحة وقومه
واليوم قدهم شعر ضبيٍ وقشراني

****

لن كلمت الحق ما تظهر ومعدومه
اللي كتمها مهو بانسان .. شيطاني

****

هذا زمانٍ تساوا الصقر والبومه
والذيب سرحان ماعاده بسرحاني

****

ماهو كلامي لكن الوقت ونجومه
تغيروا والعرب ماحد مع الثاني

****

صارت حقوق الكفوا والقرم مهضومه
واللي من اول يسموَّنه كحيلاني

****

الناس في بعضها ياناس مصدومه
من غلطت افلان تعرف غاية افلاني

****

ليَّام تكشف ردي الفعل وعلومه
والناس تدري بها والشرح مجاني

****

ارزاقنا عند رب البيت مقسومه
وايامنا بالعدد من غير نقصاني

****

‏سود القلوب أصبحت بالحقد ملغومه
‏لو تنكشف ثورت تثوير بركاني

****

ربي سترها بصدر وجسم وهدومه
من ظغطها تحترق من غير دخاني

****

وحنا بشر والبشر بظروف محكومه
لولا الطمع والنِعَم ما فالعرب جاني

****

وهذي نصيحه بقدَّمها ومعلومه
ماجاء ابن عمك يجيك وشانكم شاني

****

ماعاد به سوق لابيعه ولا سومه
بمصامخ الروس يظهر كل قوماني

****

علمي عفاكم وملح الطارش علومه
ومن سمع علمي نشدعن فعل شيباني

****

الشاعر / ناصر بن شتوي آل عمران


1 التعليقات

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح