“ماهزك الشوق” قصيدة للشاعر عمران الزراقي



الرأي - أمل الشمري

ماهزك الشوق والا ماجذبك الحنين؟!
أنا ترى مابقى بي حيل وأنا انتظر

••••

واقف وأناظر مكانٍ منه عادة تجين
مجيك اللي يذكرني مجي المطر

••••

ماباقي الا أتهوّر وأنشد العابرين
( مامركم عود موزٍ في علوه ثمر ) ؟!

••••

عاد أنتي الله فرق زولك عن الآخرين
بكل مافيك فتنة تلفتين النظر

••••

من شافك يقول ماباقي مع الناس زين
واليا عرضتي على مسلم ما طيره خضر

••••

بالذات لـ أقبلتي بمشيتك تتبخترين
يسبق قدومك نسيم وريح ورد وعطر

••••

والخطوة العايدية عندك بخطوتين
يادوب تمشين ماهو من غرور وكبر

••••

لا والله ألا من النعمة وماتحتوين
بالمختصر فتنةٍ تذبح وموتٍ حمررر

••••

وباقي التواصيف محجوبة عن المسلمين
أخاف أوصفك ثم كبودهم تنفطر

••••

يا غايبة عن نظر عيني متى ترجعين
ماعاد فيني على شوفتك قطرة صبر

••••

في غيبتك ضايقٍ صدري وقلبي حزين
أما خوي العنا وألا خوي السهر

••••

لو ماهي أول ولا آخر مرةٍ تبعدين
لكن هالمرة الظاهر فراق وهجر

••••

عندي شعورٍ يراودني وعندي يقين
إنك ماغبتي كذا الا في ضميرك خبر

••••

أذكّرك ب الوصال إن كان ماتذكرين
آخر لقا مر عنه من الليالي عمرررر

••••

ماني بقايل تراها مرت أربع سنين !!
لا والله أربع سنين وكل يوم بشهر

••••

لكن ابصبر مدام الله مع الصابرين
أكثر من اللي خسرته ويش عاد أخسر

••••

يمكن مع الوقت قلبك للمواصل يلين
لو إني ادري ماغبتي غير قلبك حجر


1 التعليقات

    1. 1
      مجرد مرور

      سمعت مقطع للشيلة وجيت ابحث عن كلماتها، اختيار رايق

      (0) (1) الرد

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح