“على هواه” قصيدة للشاعر ماجد المقوعي



الرأي - أمل الشمري

على هواه وجعلها خيرةٍ له
هو يمكن اريحله وانا ابغاه يرتاح
°°
الارض تضحك والسما مسفهله
والوضع عادي لاخساير ولا ارباح
°°
لاطاح شيخ ولا انكسر بيرقٍ له
ومرواح من يبغى المراويح مرواح
°°
هو علق انغامي على جدار ظله
وعلقت مواله على غصن تفاح
°°
روّح وانا قلبي محله محله
لاحرك الساكن ولا المعتلي طاح
°°
راح وخذا للبوح وضح الادله
وانا خذيت الصمت والصمت ماباح
°°
وعادي يغيب الهرج دقه وجله
بعض المواقف حرفها كف سفاح
°°
اكثر كلام الآدمي عند غله
يضيع بين التمتمه والتنحناح
°°
لكنها عدت وابشرك والله
لاحالةٍ جفت ولا ناظرٍ شاح
°°
وانا ادري ان البعد بين الاخله
مغراس شلفا والبطا كنه رماح
°°
وكن الخليل اللي نوى غدر خله
خيال قشرا لانوى الذبح ذباح
°°
لكن من هوجس ع الدرب دله
لاتعترض وجهه ولا تكثر نياح
°°
الطير سبقه لاتنكر وتله
ماله طعم لاجاك من عقب ملواح
°°
خله يروح ولا تلوث سجله
حفظ العهد من منطلق حفظ الارواح
°°
ومادامها جلسه على وجار دله
اقدع من التمره وخاطرك منساح
°°
من اقبل اقبله ومن راح خله
ماهو نهاية عالمك واحدٍ راح
°°
اللي يروح بخاطرٍ جايزٍ له
اعزم على فرقاه في قصر الافراح

°°

الشاعر : ماجد المقوعي


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح