“سهرة مع الكواكب” قصيدة للشاعر عبدالله الشمري



الرأي - مضواح بن شتوي

لا عسعس الليل واضفى ضافي سدوله
عيني صحبها السهر والنوم حاربها

••••

كل المحطات حول الارض مشغوله
وانا المجره تسامرني كواكبها

••••

غريب وانظر وجيه الناس مجهوله
اصد و الناس مختلفه مشاربها

••••

ديارهم موحشه بالجن مأهوله
رقط الافاعي تطوّى في مضاربها

••••

الروح في راحة الحرمان محموله
ماهو من اليوم من مبطي متاعبها

••••

مالي ومال الذهب لا صرت ما انوله
ياما من الناس ما نالت مطالبها

••••

اصارع الوقت واصبر واطرد فلوله
وغيوم الافراح في رجوى سحايبها

••••

والوقت يرقص على الهامات بندوله
والناس يعرف خفاها من تجاربها

••••

في خاطري شي مزعلني وابا اقوله
ما همني ردة الفعل وعواقبها

••••

قولو لوجه الفلس بشته مهو طوله
وعظامه اللي نقلها مات صاحبها

••••

بعض الاشده من الصفصاف معموله
تضحك عليه البشر لاطاح راكبها

••••

بعض المقابر من الحيين منزوله
وقبورهم ما بعد رزت نصايبها

••••

رجال بأفعالها بالخير مجبوله
وصلت مجال الفخر من فوق واجبها

••••

ورجال بحظوظها بنعوش منقوله
ياليت رد الجزا تنتف شواربها

••••

الشاعر: عبدالله محمد الشمري


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح