قصيدة “موؤودة الشعر” للشاعر خلف بن مشعان العنزي



الرأي - أمل الشمري

موؤودة االشعر اصرخت في قبرها البارح تعال
ادخل على الله يايبه وقّف .. تراي بنيـتــّك ..!
••••••
قلت : اسكتي بس اسكتي / مالك عن الدفنه مجال
قسّيت قلبي عن وجع .. صوتك وفرحة جيتك ..!
••••••
محدٍ بيسمع صرختك / والشمس آلت للزوال
ادعي لي الله عن خطا دفنك بحفرة خــيـّـتك ..!
••••••
كم بنت فكرٍ حسنها فتنه / وطلتها خيال
.دفنتها ياهاجسي حيّه / بقبر احميتك ..!!
••••••
عمق القصايد مشكله / تشغل مناديب الجدال
ناسٍ تعدى مقصد ابياتك ، لمقصد نيتك ..ّ!!
••••••
والذوق بير ٍ / دلوها العقل / ومفاهيمه احبال
ماكل دلوٍ تمتحه .. / .. يروي عطش عقليتك …!!
••••••
اللي يقول انك عمى / قله عمى / يابن الحلال
ماني بصادم بالسما / وفر تعب دوريتك ..!!
••••••
أحدن يقول اللي فهم / واحدن يردد مايقال
واحدن يحدد موقفه بالشعر … من شخصيتك ..!!!
••••••
كلٍ يقول المفترض ..! والمفترض شيٍ محـال
ماينتفخ راسك لجل … يركب على طاقيتك …!!
••••••
لاتفترض / وبل السما رحمه / ترى كثره وبال
مار انتبه ياهاجسي تـعطي الرجال ، لحيّتك ..!!
••••••
اللي يدور بك .. خمال / اكيد يلقابك خمال
محدن بيحفظ حسْنة افعالك .. وينسى سيتك ..!!
••••••
غرد على مايشتهي حرفك .. ونافس من خلال :
صدقك / دهائك / طيبتك / نبلك / نقا عفويتك ..!!
••••••
اعكس مسار الأنظمه تقطف محاصيل الجمال
حرك ركود الشيطنه واحذف حجر رسميتك ..!!
••••••
لا تقتنع بالأمثله .. اجعل قناعاتك .. مثال
مارس تواضعك بثقة تغنيك .. عن فوقيتك
••••••
لاتكتف يدينك على صدرك تفكر بالسؤال
حرر قيود الأجوبه .. واترك سجن .. حصريتك
••••••
خلك رياح ٍماشيه واترك لهم .. شـــــم ّ الجبال

خل الثبات يفيدهم … واحرص على حريتك ..!!
••••••
خذهم معك يم الجنوب وخلهم / وارجع شمال
اليا مدحو رمزيتك عود على سطحيتك …!!
••••••
لايمنعك حب النصر انك تصفق للهلال
ان مارفعو شعبيتك مانزلو شعبيتك

••••••
الشاعر/ خلف بن مشعان


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح