قصيدة “مشاريه القصيد” للشاعر خالد بن وزي الله الشهري



الرأي - مضواح بن شتوي

تاخذني الدنيا وتقبل بي مشاريه القصيد
اللي عنَه ماني بمبطي من قليل ولا عدم

•••••
لكني ادرا خُطّر العالم وادور للجديد
اللي يعانق غيمة الابداع في روس القمم
•••••
حقً علي اليا نظمت انظم من الدرّ الفريد
وارفع عن الهزله وعن كرّاسها راس القلم
•••••
وان قالو الخطوه بعيده ماعلى الواثق بعيد
اشره على اللي مايشب النار في راس العلم
•••••
شاعر جنوبي للفخر والعز والرفعه حفيد
يلقى على اليمنى دحيم وبلحصين الا دحم
•••••
يوم الغنى ما زاد من قسمه من العليا زهيد
ما ورث من خاله وابوه الا ثلاثمية نعم
•••••
والحمد للي كل مادونه من العالم عبيد
حمدً يليق بما تفضل به علينا من نِعم
•••••
يارب انا مالي من اعمالي حساب ولا رصيد
لو لي بها في جنّتك يا خالق الجنه عشم
•••••
ان كانها ماهي بغفرانك ولطفك يا مجيد
عز الله ان مالي على دربً يوديها قدم
•••••
استغفرك واعوذ باسمك من ردا الحظ الزهيد
اللي حسيبه كل ما قدّم يعود به هلم
•••••
واللي يحسب انه عن الدنيا مفارقها وحيد
ان ما لقى له من يونس وحشة الظلما ندم
•••••
والناس ببين القانعين وبين اهل هل من مزيد
والفرق في نوع القماش ولا هو بطول الكمم
•••••
كلً يدور له على الميقاف رجالً سديد
لا دق صدره ما يورد به على غير الشحم
•••••
سلم على اللي سخرّه ربي يفيد ويستفيد
بين العرب يخدم على قدّ الكلام وينخدم
•••••
واترك بخيلً لا فقِد بين العرب ماهو فقيد
بعض البشر لا يستره موته ومقعاده عدم
•••••
العمر مره والبليد اللي من احساسه بليد
والموت حقّ ولا يدوم الا عزيزً ماظلم
•••••
ياللي ليا هبّت هبوب ومالت اغصان الجريد
قامت تسامر نجمة الذكرى على جال النغم
•••••
فاحت صدور العاشقين وذابت امواج الجليد
وانا على الموعد فقيرً ضاع عمره في وهم
•••••
لكن ليا حدتني ضلوعي على الخطوه وحيد
اما هزمت الشوق ولا طحت دونه منهزم

•••••

ياوجهها اللي كنّ نوره يوم شعشع صبح عيد
يبري مجاريح الظلام وينحر فجوج العتم
•••••
قولو لها لا مرّها ذكري عسى ربي يعيد
ليلً على لذّة شفايفها خذا عقلي نهم
•••••
اقبلت واشواقي قصيده ما رووها عن (لَبيد)
قبلة ظليمً قبّل الدعوه على باب الحرم
•••••
واقفيت وانا اداري الدمعه على الطرف السهيد
دمعة يتيمً عن مقابل والدينه منحرم
•••••
عز الله اني في هواها بين ميعاد ووعيد
لكنّ دعاها لا زهمني كنّ ماغيره زهم
•••••
ضميتها ضمّة غلا بين الحنايا والوريد
وشرعّت بيباني لها واقسمت واثنيت القسم
•••••
اما على باب الهوى مثلي مثل غيري شهيد
ولا عسى وجه المواصل للمعنّى يبتسم.

•••••

الشاعر / خالد وزي الله الشهري


1 التعليقات

    1. 1
      محمد بن زاهر البكري

      صح لسانك
      ما شاء الله تبارك الله
      شاعر جزل ومتمكن
      وأتمنى أن يكون لك مشاركات مستقبلا تثري الساحة الشعرية بمثل هذه القصيدة وأنا متأكد بأن لديك الكثير

      (0) (0) الرد

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح