قصيدة “حب الخـشوم” للشاعر مشاري النـثري



الرأي - أمل الشمري

يارفيقي في محلك تريح ومخدوم
لايسم الهم حالك ويوليك اهتمام
•••••••••
لابليت بـ هم الايام والبال مهموم
واجزعك رمح العنا واجزعك رمح الهيام
•••••••••
صد صدة شيخ قوم ٍ مقدر ومحشوم
لارضى قلبه قلط وان جزع كرّم وقام
•••••••••
المشاعر صيد والياس قرناسٍ يحوم
لاهتوى المطلاع عكّف مخاليبه وحام
•••••••••
كل يوم نقول نرتاح وتزين العلوم
لين صارت كل يوم بـ نظرنا كل عام
•••••••••
ابتلشنا بـ الشقا وابتلشنا بـ الهموم
من يسلفنا صبر من يسلفنا منام
•••••••••
شب نار الحلم واحلم ترى الايام قوم
لاسلمت من العنا ماسلمت من الملام
•••••••••
واجه الشدات وانهج مناهيج السلوم
من تحزّم بـ النقا لايذل ولا يضام
•••••••••
مابقى فالصمت مقيال من حر السموم
نار لفحه تشعل النار بـ قلوب الثمام
•••••••••
صاحبك كم له يسامر مطاليع النجوم
طارت اماله وضاعت مع اسراب الحمام
•••••••••
وده انه يكتم الجرح فالصدر الكتوم
لين حصّل وادي هيام لـ همومه وهام
•••••••••
الضلوع لـ فارس الكلمه كنانة سهوم
كل مايجتاحه الشوق لـ سهوم الكلام
•••••••••
مابغيت الحّق الياس ولاّ اللوم لوم
لين حط الصبر راسه على كتفه ونام
•••••••••
وان ذكرت الليل والحلم وبروق الغيوم
كني ارمي حربة النور في وجه الظلام
•••••••••
من معزة نفس اجنّب عن الغلطه واشوم
ولا يلام اللي لقا ميتة حرجه وشام
•••••••••
ماتعبنا للوفا قصدنا حب الخشوم
ولاعشقنا سيرة الحرب كرهٍ فـ السلام
•••••••••
والله انّى وارثين الشموخ من القروم
حد سيف وسرج وعنان وشداد ومقام
•••••••••
ان جلسنا ماغبطنا شماريخ الرجوم
وان وقفنا مانظرنا تحتنا للغمام

•••••••••
الشاعر/ مشـاري النـثري


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح