قصيدة “رصيدي الصـافي” للشاعر “صالح بن كحله”



الرأي - أريج الشمري

 

 

البر للصدر طب لاتبين سهيل

وجو المدينه وزحمتها يتك انسمه
•••••
لا طاحت الشمس جاك الهم عابر سبيل
وبنات فكري تطوف بهاجسي محرمه
•••••
ياليل والشعر دلة كيف و الفكر هيل
اصب فنجالها لي واستلذ اطعمه
•••••
لو طعمها مر عندي كنه السلسبيل
تزيح هم بصدري مركيٍ ميسمه
•••••
غناة نفسي مطوعها بصبرٍ جميل
مالي سوى ماكتب لي خالقي واقسمه
•••••
واسج في خايعٍ ماسوم من غب سيل
و ابعد عن اللي يسوي في الرخى ملحمه
•••••
ياتاجر الحكي خسران ولا لك حصيل
بضاعتك في ملامح وجهك المظلمه
•••••
هذا الزمن قرّب الممكن من المستحيل
يحتار فيه العقل باوضاعه المبهمه
•••••
فيه القريب لعدو اعيونك اصبح خليل
ولا عاد تستغرب ان شفته يرز اعلمه
•••••
بعض الصداقات تحكمها اجتماعات ليل
وراعي المصالح لاخذاها يربط الأحزمه
•••••
الناس ماترحم المخطي لا بار العميل
وماكل بيضا على قول المثل بشحمه
•••••
ياحاسدين الفقير لو حصيله قليل
قد قيل مافي الحيايا حية مسلمه
•••••
والقارشه لا رماها الله بوسط الشليل
ان مانفضته عواقبها تجي مؤلمه
•••••
تعميم الاحكام عذر اللي ماعنده دليل
والعاقل اللي حفظ قبل اللسان لقلمه
•••••
رصيدي الصافي اللي رفقته ماتميل
رفقة وفا ماخدشها فعله ولا .. فمه
•••••
للغلطه اللي من الصاحب ظلاله طويل
والعفو عند النشاما في المواقف سمه
•••••
ويحرجني الطيب اللي كاسب بي جميل
لا جاني يسوق جاهه في لزوم رخمه

صـالح بن كـحله

 

 


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح