قصيدة ( بنت السجين ) للشاعر : محسن بن فالح الدوسري



طولت يابوي غيباتك وذا الغيبه غبينه
كل ساعه من غيابك يايبه ندفع ثمنها

أنت في سجنك سجين وصرت من سجنك سجينه
حالتي صعبه ولاشفت البنات أصد عنها

لش تتركنا على موج البحر فوق السفينه؟
والسفينه لاغدى ربانها ماحدٍ ضمنها

يايبه وش موقفي لاقيل أبوك اليوم وينه؟
تغرق الدمعه عيونٍ غير همك ماشحنها

أبلتي مهما تواسيني أنا بعدك حزينه
أحتظنك أبليس والطفله من اللي يحتظنها

نوب أقول أبوي ظاعت قيمته من بعد دينه
ونوب أقول الله غفور لمن عصى النفس ووزنها

أتمنى رحلةٍ مابين مكه والمدينه
وأنت تامرنا على خمس الصلوات وسننها

يايبه صوتك ترى كلبونا فاقدينه
أسرتن من دون أبوها مهرتن تسحب وتنها

يايبه شوفتك تغنيننا عن كنوزٍ ثمينه
الثمن والكنز لامن قمت تامرنا وتنها

وش حياة الطفل لافارق رعاية والدينه
وكم سجينٍ ضحكة أطفاله مع سجنه سجنها

الشاعر / محسن بن فالح الدوسري


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح