الرأي - مضواح بن شتوي - الرياض
في لاهب الكنّه رحلت وتعزمّت
صايم وعيد الفطر ضيّع هلاله
***
طالعت غدران السراب وتوهّمت
بالقيض والعوشز عديماً ظلاله
***
فردوسي الموعود جيته ويمّمت
يم الضياع و لاح برقاّ بداله
***
غشيم مدري في مناله تغيشمت
والاّ بدم الروح يشرى مناله
***
ارجع ورى وانا احسب اني تقدّمت
خطاي والاّ عاثر الحظ عاله
***
قدّام ديوان المظالم تظلّمت
ذكرت بالمعروض وين العداله
***
في خيبة الهقوه ضحكت وتهكّمت
على الشمات و حالة الحقد حاله
***
هم يحسبوني طحت عجز وتحطّمت
وانا سريت الليل عزم وبساله
***
ياما على بعض الجنايز ترحّمت
جنايز الاحيا الضعوف الحثاله
***
طلعت من سوق النذاله و لا سمت
وشبّهت بوجيهاً بسوق النذاله
***
دخلت في بيت المكارم و سلّمت
وكتبت لأشعب بالوقايع رساله
***
ان قلت من سود الليالي تعلمت
جهلت واكملت الخطا بالجهاله
***
يا حارس القصر الذهب لو تكرّمت
انا ملكت القصر طيب وجماله
***
ما اقول في بعض المواقف تندّمت
ما بالحسايف خير لأهل الجزاله
***
عبدالله محمد الشمري
(
(
