الرأي - مضواح بن شتوي - الرياض
يا أكبر أحلامي تعلّم من أحلامي الصغار:
” كيف تصنع لذة النصر فـ الشي البديه “
***
لاتمّل من المسافاااااات لو طاااال المسار
العسر ضيفٍ مصير البشاير تقتفيه
***
إنكسارك في عيوني ! تراه الانكسار
اللي مٓ أدري هو أناْ أبكيه والا أضحك عليه !!
***
أعرف إنها ما تجيبك “دورب الاختصار”
إختصاراتك تعرضّني لْشيٍ مَ أبيه
***
أسهل دروبي لـ وصلك اذا ممشاه عار ؟
والله إني لا أثني عقال ساقي قبل اجيه
***
من سنيني خذ مايجعل لـ مقدارك وقار
ومن عزومي خذ ما يفدي به الرجال أخيه
***
لاتقول الصبر طيرٍ نفض ريشه وطار
شف مصير الحُر لا صار ذله يعتريه
***
والا انا فـ الله تعالى هقاويي كبار
جل شان اللي على حسن ظن العبد فيه
***
لو أطاوع نزغة النفس لفّت بي يسار
و أجبرتني لـ المحايل وللطبع الكريه
***
وصارت أطماعي محطات وعيوني مطار
كل يوم أستقبل وْجيه و أودّع وجيه
***
بس مؤمن بإن ما كتب لـ المخلوق صار
يكفي إني أمتلك شي .. غيري يرتجيه
***
القدر ما عنْه صدّه ولا فيه اختيار
غير قول : الحمد لله .. بدل م تقول : ليه ؟
***
الشاعر عبدالله الزهيري