قصيدة”أنـا القديـم” للشـاعر”مبـارك بن عنيـن”



الرأي - أريج الشمري

ياوقت كم جمّعت فينا وفرقت

حتى الصديق احيان يفقد صديقه

••••••

اوهمتني بآمال فيها تعلقت

وضاعت مابين الثانية والدقيقة

••••••

ياحلم ليل وللأسف ما تحققت !

لاعاد ترجع لي بنفس الطريقة

••••••

تسوقني يم المعاذير وانسقت

وانا ماعندي غير حق وحقيقة

••••••

ماني مصدّق كيف وشلون صدّقت

هذا مسبب لي براسي شقيقة

••••••

يضيق خاطر صاحبي كل ماضقت

واضيق لو حزّه من الوقت ضيقة

••••••

وش حيلتي لامرني الشوق واشتقت !

لأشياء قديمة منزلتها عميقة

••••••

انا القديم اللي بطيبي توهقت

ولارضيت الطيب يفقد بريقه

••••••

غرّبت في بيض النوايا وشرّقت

وقدّمت رَحلي في نحور الوسيقة

••••••

ياليتني من نومة الحلم مافقت

ماكان هقوات التمنّي غريقة

••••••

حتى لو اني في فضا الغيب حلّقت

ماعاد اطيق اللي من اوّل اطيقه

••••••

العذر والتبرير والصمت والمقت

ماتجتمع في صدر شاعف حريقه

••••••

خريف عزمي حتّ ياسي و ورّقت

ومن بعدها كلّن مشى في طريقه

••••••

عزمٍ عليه بـ كفّ هقواتي اطبقت

وجاله من صدوف الدهر مايعيقه

••••••

لاشك انا عندي مشاكل مع الوقت

من هولها كم صاملٍ جفّ ريقـه

..

الشـاعـر :

مبـارك بـن عنيـن


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح