الرأي - منوة العبدالله  

يالبيه من روح الغلا هايمٍ لبيه

ياعشقٍ بقلبي خافيٍ ما يعرفونه

تمرالسنين وطاري الحب ما نبديه

وهو في صبي العين لو هم يشوفونه

لك الله ياجرحٍ من أحزاني مصاليه

وهمٍ يسوجه وآخرٍ واقفٍ دونه

وشيٍ كتمته بالحشا عامدٍ مخفيه

ولو هو تبين جدد جروح مطعونه

وذود الغلا وسط الخلا ضيّعه راعيه

على صحصحٍ ذيبه عوى وأختلف لونه

يخيل الحيا عله على المشتهى يسقيه

وتدبر سنينه والحيا يخلف ظنونه

وعزاه من همٍ تشيله ولا تذريه

هبوب الجروح اللي لها الروح مرهونه

وأنا من هبوب أوجاع قلبي أقول أحيه

ولا من يدفي خافقٍ زادت حزونه

سلكت الطريق اللي سلكته وفي تاليه

لقيت أن قلبي علته كثرة شجونه

ولقيت أن تردادي على سكته يدميه

ولقيت أن عشاق النقا ما يدانونه

تعبنا من مطارد بروق الهوى والتيه

ولا حصل الظامي مراهيش يروونه

ومدام الغلا كله تمرّد على باغيه

مثل ما تمرّد مارد وعزت حصونه

طويناك ياصفحة غرامٍ عجزنا فيه

مثل طوي دلوٍ عن قليبٍ يرودونه..