الرأي - مضواح بن شتوي - الرياض
قال من جرب وأخذ من تجاريب الرجال
وعلمته احداث الايام ودروس الحياه
***
جل شان اللي تفرد لوحده بالكمال
وعز شان اللي يطيعه وذل اللي عصاه
***
من هداه الله يجنب به دروب الظلال
ومن أضله خالق الكون ماحي هداه
***
والمعرفه كنز والحلم ربح وراسمال
وصحبة الاخيار عون علا درب النجاه
***
ودايم العارف حموله من الشرهه ثقال
ويعتبر عرفه طبيعي ويستغرب خطاه
***
واثقل حمول النشاما معاريف الرجال
يوم ولد اللاش لي جاه معروف نساه
***
والقناعه تشرح الصدر والرزق الحلال
واشهد انها لاكثر الناس أخير من الغناه
***
كم فقير يكسب الطايله من قل مال
واجتهد في طاعة الله ونال بها مناه
***
وكم غني جا له المال هم وانشغال
ولاكسب منه جميل ولا جاله طراه
***
جاه من جمعه وجع راس وهموم ونكال
وراح واخذ الوارث المال وحسابه وراه
***
وان تعصت مابرك للحمول الا الجمال
والردي في ساعه الضيق مايذري ذراه
***
وشجره ماقد لقى عرقها منها ظلال
جعل ابو جنزير من لارض يجعلها وقاه
***
وصحبه الرديان بيت على جرف هيال
لارتفع مبناه طاح وتوقا من بناه
***
والزمن دوار مادام له في الناس حال
وان عطاك الله خيره فلا تامن بلاه
***
من شرب من صفو دنياه تسقيه الحثال
لايزيد بها طموحه ولا يطول رجاه
***
والختم صلو على المصطفى عد الخيال
عد مالاحت بروقه وما ينشي بماه
***
الشاعر/ ذيب بن سعيد آل سوده القحطاني
(
(
التعليقات 2
2 pings
☺
15/12/2015 في 4:25 م[3] رابط التعليق
قصيده رائعه وابو عبدالله معودنا على قصايده الجزله الله يصح لسانه
ابو فهد
17/12/2015 في 2:56 م[3] رابط التعليق
تحية شرف لك يابو عبدالله
ماشاء الله تبارك الله في قمة الروعه