قصيدة “خلوني اقضي لزومي” للشاعر عبدالرحمن بن بديع



الرأي - أمل الشمري

خلوني اقضي لزومي واضرب الباب
‏يغنيني الله ولابعض الميانه
•••••
‏ياليتني ماوثقت ببعض الاصحاب
‏لاعاده الله ولايسقى زمانه
•••••
العام عشان عينه نزعل احباب
و انقوم و انطيح يوم الشان شانه
•••••
و اليوم صرنا في عينه مثل الاجناب
حتى سلامه علينا فيه اهانة
•••••
يا جامع الشمل جنب خاطرن طاب
لا عاد اشوفه تراها معك أمانه
•••••
لا عاد تندب علي الا ليا غاب
جات الجفية و مسينا بطانه
•••••
لا تحسب المشكله طبنا و لا طاب
المشكله ما سلمنا من لسانه
•••••
و الهرج ما عيّب الطيب و لا عاب
ولا ينزل رفيعن من مكانه
•••••
الهرج ماله عن الاجواد مجناب
لو جنّب اهل المجامل والجبانه
•••••
اللوم كله على ابو زيد وذياب
لا قام كلن على صهوة حصانه
•••••
تم العرب عن بعضها صارت احزاب
تبكي على الرافدين أرض الكنانه
•••••
عزالله اني ضحية بعض الاسباب
هقيت لي هقوة ماهي تكانه
•••••
لو شيمة الشخص مع الاسما والالقاب
قبل اسم جنسيته واسم الديانه
•••••
ماشيف مثلي عرب تخدع وترتاب
وتذوق طعم التنكر والخيانه
•••••
من طوع شوري يجنب شجرة الداب
أحياناً البُعد نوع من الفطانه
•••••
بعض الرياجيل يبرالك وكذاب
ما غش بعض الملوك الا البطانه
•••••
اما توفقت في عكفان الاشناب
اللي ذراها على الصاحب حصَانه
•••••
ولا اقطع الصوت مره واغلق الباب
واكتب على الباب مغلق للصيانه

•••••

الشاعر/ عبدالرحمن بن بديع


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح