ان رحت غالي ونت غالي ليا جيت
دامك مع الحيين سج الخريمه
لا بد في تالي حياتك تجي ميت
اركب على خيلك مادامت سليمه
وَرْخ العنان اليا بدت لك مشاويت
لاخير في رجلٍ بليا عزيمه
من كثر ماصابه يجر التناهيت
ماطاع شور أهل العقول الحكيمه
ما تنفعه ياليت سويت. ياليت
والوقت وان ضامك وشفت الهزيمه
لاتشتكي تكثر عليك التشاميت
بادر بقول الطيب قبل الشتيمه
والجود والطولات عمِّر بها البيت
وخوت هل الجزلات عز وغنيمه
تاتي لك الدنيا على ماتمنيت
ولا تطيع اهل القلوب السقيمة
خلهم وخل ديارهم ونت لبْخِيت
وجنب رجال(ن) ما تعرف الحشيمه
تقربك للشين لو كان مخطيت
واهل ألوفا واهل الفعول الكريمة
ذخر ليا ضاقت عليك وتهاويت
لا من تخلى صاحب(ن) عن نديمه
تاقف رجال(ن) في المواقف طواغيت
عونٍ ليا جتك الليالي عقيمه
مثل الجبال الراسيات الثوابيت
وفي الناس تلقا لك رجال(ن) فهيمه
لحتجتهم عد(ن) رهاوي كما هيت
وكلن على الميدان ياسم وسيمه
يبغا يحقق شيء ويقال وفّيت
ما يدري ان بخل المراجل خصيمه
والطيب يجعل له مع اهل الكرم صيت
كلمات/ناصر بن هلا الحبابي