يا مكثر الصدقان في وقت السعه =لكنَّهم عند اللواااازم يختفون
ومن ينفع المحتاج وقت المنفعه =يا جعل من غدر الليالي مايهون
حبل الجمايل عقَّب اللي يقطعه =ماهو يعز الراس يا كون المتون
واللي سلومه للمراجل تدفعه =لا يلتفت للي عليه يخططون
واللي ماهرجه في المواقف يرفعه =يجلس مع اللي في المنازل يجلسون
الطيب لاهله والوفاء من منبعه =والا الرداى من عاش به مات امغبون
عسى الردي رب الخلايق يقلعه =وجعل الهلايم من عربنا ينتهون
القرم كلٍ لا تكلم يسمعه =والا الردي ماهم لهرجه ينصتون
اترك مخاواة الضعيف الامَّعه =اللي عليهم اهل المراجل يضحكون
من يقمع اهل الطيب لازم تقمعه =وان تعتزي غيرك رجال يعتزون
ورفيقك الوافي ليا اشر بصبعه =شد الحزام ولا تجي الهقوات دون
تبقى بيوت اهل الجميل مشرعه =والعز له ناسٍ قروم وله زبون
المال يتعب من يحاول يجمعه =كم تاجر ما خوه في ماله يمون
من يفعل المعروف مااحدٍ يمنعه =يالله عسى مااجي مثل من يقنطون
مادام نارك من صباك مولَّعه =اليا كبرت افلح مع اللي يفلحون
راعي الحيل والكذب حاول تقنعه =قله تراء الارزاق من حسب الضنون
من طاع نفسه بالهواء ما تشبعه =جوع المشاعر غير عن جوع البطون [/poem]

الشاعر حمد بن فرجه العليي