هذا الزمن لاتأمن افلان وافلان
الناس جاهم شر يالله السلامه
يجلس معك شيطان في صورة إنسان
متقمص” دوره ولابس وسامه
بعض البشر شغله دعايات وإعلان
علي جروح الناس يكرب حزامه
يامدور العثرات ويش انت كسبان
مالك ومال القبر تنبش عضامه
الناس ماترفق علي كائن كان
(حتا الجنازه يلحقونه ملامه)
بعض البشر ودك تحطه بالأعيان
(من طيب ذاته فارضٍ احترامه)
وبعض البشر ودك مايخلق له لسان
من شان تسلم من غثاه وكلامه
وبعض البشر ودك تداريه من شان
(تمركزه بالطيب فوق العدامه)
في كل يوم ٍ يطرق الباب ديان
لوعات بقعا في جبينه علامه
يضحك لو ان قلبه من الهم مليان
عايش حياته ماتغير نظامه
ياصاحبي لا شفت وجه الزمن شان
عليك بالشيمه ودرب الشهامه
اصبر لو أنك يا ابيض الوجه بلشان
والصبر مايلحق رفيقه ندامه
خل الرجاء في خالق الأنس والجان
تلقى الوفق من ربنا والكرامه
واعلم ترا لحسان يجزا بالإحسان
من قدم المعروف يلقاه أمامه
وعليك بالمسجد ليا أوحيت الأذان
صلاتك تنجيك يوم القيامه
ويالله دخليك من صواديف الازمان
الوقت ذا خالط حلاله حرامه
سعود الخريب
(
(
