يا محبين المظاهر ترى الطيب معروف
نعرفه واللي يحب المظاهر يجهله
كْثرت ضرب الفلاشات قدام الضيوف
دايم اللي يطلب المدح.. عنده مشكلة
كنه اول شخص فالارض يذبح له خروف
ما درى بإن الرياجيل راعين أوله
خل تزييف المشاعر وتزييف الحروف
انا اشوف الدين وحدة قياس المرجلة
كان ما يحلقك من يم رب البيت خوف
منت طيّب لو ذبحت لطراقيك.. فْيله!
كل يوم الوقت يرسل كتايب من ظروف
وكل يوم نشيل شوكة ونزرع سنبلة
نقتحم بوابة المجد رغمًا عن انوف
العداوة والمحابيل والحسد وهله
والله ان مسببات الكآبة والحسوف
لا سعى الانسان في حاجةٍ ماهيب اله
فيه ناسٍ عندها عين لكن ما تشوف
وفيه ناسٍ عندها عقل ما تستعمله
ما نخاوي غير منهو على الطيب معسوف
ابلجٍ نرمي عليه اللزوم ونزهله
ان وقف ما فالمواقيف ممنوع الوقوف
وان ضرب صدره ضرب لك على الطيب أمثله
الصغير ان جته كلمة من حلوق الضعوف
تنفجر في طبلة الاذن مثل القنبلة
والكبير اللي تعوّد على شق الصفوف
يذبح كبار الشياطين وبشسع نعله!
@JamalBander
تويتر
(
(
