ان قلت كيف الحال ؟ رديت لك زين
وانا لي اسنين آتزين ،،، ولازنت
••••
وان قلت منهو انت ؟ماجاوبك ، لين
تصبر علي لحظات اسحب لك برنت
••••
يمكن انا انسان ،،، ماله عناوين
ويمكن انا اوهام للحين ماكنت
••••
أرجوك لاتسأل على وين ومنين
عشان عينك غبت ،، ولخاطرك بنت
••••
عرفت كل الأنضمة والقوانين
حتى تعلمت الخيانة ،،، ولاخنت
••••
أمشي مشاويري لاادري على وين
أطرد ورى خيط الأمل ماتمكنت
••••
لو يدري يوم السبت وش خبّاالإثنين
ماشفتني أشرب من الصبر وادمنت
••••
ويوم الأمل يسكن عيون المساكين
دفنت أجمل أمنياتي ،،، وحزنت
••••
وصبرت أكابر ،،، لين ذقت الأمرين
وعزيت نفسي ،،، للملا ماتمسكنت
••••
انا وقلبي وأنكساري إلى الحين
ندفع ثمن أخطائنا ،،، والسبب أنت
••••
غابت سنينك صرت من فوق عشرين
وأنا ليا من مر يومي ،،، تجننت
••••
ذنبي وذنبك ،،، يوم كنا مجانين
ليتك قسيت بوجه حبي ،، ولا لنت
••••
عمر الإهانة ،،،، ماتطول العزيزين
ولا انهنت ،، لكني احس اني انهنت
••••
الشاعر: عوده العقلا
التعليقات 5
5 pings
إنتقل إلى نموذج التعليقات ↓
حامد الغنام
14/07/2018 في 7:47 م[3] رابط التعليق
ماشاءالله قصيدة جزله صح لسان الشاعر عودة
(0)
(0)
محمد الحويطي
14/07/2018 في 9:15 م[3] رابط التعليق
ذنبي و ذبنك يوم كنّا مجانين
ليتك قسيت بوجه حبي ولا لِنت
ابدااااع
صح لسان الشاعر
(0)
(0)
فهيد عامر
15/07/2018 في 2:24 ص[3] رابط التعليق
صح لسانك يا جزل المعاني .. شاعر متمكن وكل كلامك حكم .. أنـــــا فخور اني تتلمذت على ايدك تقبل تحياتي يابوسامي
(0)
(0)
فهيد الحازمي
15/07/2018 في 2:36 ص[3] رابط التعليق
قمة الابداع
صح منطوقك ياجزل المعاني
(0)
(0)
فهد عبدالله
15/07/2018 في 3:09 م[3] رابط التعليق
مبدع كالعاده اخوي عوده …
وصح لسانك على هذا الإبداع
(0)
(0)