الرأي - مضواح بن شتوي - الرياض  

كم عيبونا ولامونا بجهر(ن) وغيب
واحنا نمشي ونسكت كن مابه خلاف
****
نسمع خطاهم وندفن كل شك وريب
ونقول من هرج ذولا داخل القلب عاف
****
والا لو انا نطيع الهرج لا صار خيب
ضاعت شيمنا وصرنا في جدل واختلاف
****
مهما سعينا بفعل الطيب ما بان طيب
في ناس تنكر جميلك بين ميم وقاف
****
الله اكبر عليهم وضعهم ذا عجيب
اللي عليهم لهيب الشر خيم وحاف
****
كم واحد لا دعاك يقول لك يالحبيب
والا انت من داخله محذوف مالك ملاف
****
خذ من حياتك تجارب كن لكيع لبيب
وابعد عن اللي قروبك صدمة وانحراف
****
لو كل من فيه عيب قيل ذا فيه عيب
ما شفت واحد خصاله كل ابوها نظاف
****
لكن تصبر ولا بد الليالي تجيب
والصبر حكمة ومن ماشاه للشر طاف
****
وانا بشر والبشر يخطي ويمكن يصيب
لكن خطايه على نفسي بكل اعتراف
****
وارجي من اللي لمن هو يساله ما يخيب
تغفر سوابق ذنوبها ثقلها والخفاف
****
لو عيبوني وقالوا فيني الفين عيب
اقول بالهون يا مال السنين العجاف
****
ارضا المخاليق علة كايدة ما تطيب
يبطي زمنها وهي بين الضلوع المحاف
****
محمد بن لقفص