أنا رفيقي لا تعاوج عليّه
صدّرت واخفيت العواجه وقفّيت
****
خليتها من باب قدر وحميه
من شان ما تكثر علينا الشماميت
****
اسج بين فجوج نجد العذيه
حيث اني اسلا وسطها لا تمشيت
****
على كتاب الله وسنة نبيه
ولبس الحرام من المواقيت للبيت
****
حنا نعرف الطيبه والرديه
ياللي تحسبك طيّبٍ لا ترديت
****
من يتسع قلبه لعشرين نيه
تلعب به الدنيا على كف عفريت
****
الضعف يفتح للنفوس الشهيه
والعز يحماها بحد المصاليت
****
وترا العواجه تنزع القابلية
وتسمّج الرجال وتهمّش الصيت
****
ياما حلا ممشا الدروب النقيه
اللي عليها للهقاوي مواقيت
****
تلقى لها عند الشدايد هويه
ووضوحها ما هوب محتاج تصويت
****
ومن لا يفرّق بين هاذي وذيّه
مايفرق السمن الطبيعي من الزيت
****
يقطع خويٍّ مايقدّر خويه
وبعض الصداقه كنها عود كبريت
****
يا مكثر اللي رفقته تمثليه
متهايلة لو زخرفت بالجرانيت
****
محرومةٍ من نعمة المعنوية
وتالي نتايجها لوني ويا ليت
****
والمشكله هاذي هي الاغلبية
في وقتنا هاذا وعندي تثابيت
****
وخلاصة الدعوى وختم القضيه
من بعد ما هاضت هجوسي وغنّيت
****
من لا نفعني دامت النفس حيه
مهوب نافعني لا منّي توفيت
****
محسن فالح الدوسري
(
(
