مدخل

دعوني استهل مقالي هذا باعتذار مسبق لكم حيث اني قررت ان اكتبه باللهجة العامية الدارجة ليتناسب مع موضوعه.
... ما ادري من وين ابدأ لكن خلوني اقول لكم حكاية وهي سبب كتابة المقال
وحدة من الزميلات كانت معزومة عند صديقة لها في مناسبة عائلية صغيرة ، تكشخت صاحبتنا و وأخذت معها بنتها الصغيرة ( تقريبا عمرها اربع سنوات ) وبمجرد ما دخلوا وجلسوا بالمجلس الا تدخل وحدة من بنات اهل البيت ومعها كلب صغير !!! البنت الصغيرة بس شافت الكلب خافت وقفزت وتعلقت بأمها وهي تصارخ والكلب الخبل لما شافها تصارخ حصل عنده ردة فعل و حالة هيجان وبدا هو ينبح وينقز في كل مكان وحاس المجلس باللي فيه من ترامس قهوة وصياني حلا ولوازم الضيافة الى ان اضطرت البنت ترجع بكلبها داخل البيت بلا مبالاة !! وبدت عملية بسط الهدوء في المجلس وترتيبه ومحاولة تهدئة البنوتة الصغيرة والاعتذار من أمها اللي وضح الانزعاج على وجهها بس محرجة لا تتكلم وتنكدت الضيفة والمضيفة ، وتعالوا شوفوا شكل المجلس بالترامس المقلوبة وفناجيل القهوة اللي بكل مكان وحوسة وصراخ ،
طيب ليه الاسرة تسمح بتربية البنت للكلب؟ يعني يعتقدون انه تطور ؟ والا جهل بالحكم الشرعي بحرمة اقتناء الكلاب الا للصيد او الحراسة ؟
طيب من اللي يعتني فيه وكيف اصلا تعتني بكلب؟ ( اظن لو تطلب منها امها تنظف اخوها الصغير رفضت وتقززت ) ثم من متى نربي كلاب في بيوتنا والا بس المسألة تقليد للغرب ؟ ترا مو مدنية ولا تحضر انك تربط كلب بسلسلة وتمشي بالشارع وكأنك تقود لك فرس !! والمصيبة تستعرض به ويا أرض انهدي ماعليك قدي !! استحوا عيب
يا جماعة السالفة زادت عن حدها شفنا كثير من شبابنا وفتياتنا يربون كلاب يعني مع الحرام قرف وقلّ نظافة وسبب في انتقال بعض الامراض ثم وين الاباء والامهات وين دورهم في رفض هذا ؟المسألة ما تحتاج تقعد تقنعهم اصلا المفترض ما نخليها نقطة خلاف هذا باب لازم يغلق ويُرفض النقاش فيه ، كلاب!! مابقى الا هي نربي كلاب في بيوتنا تدخل مطابخنا وغرف نومنا ومجالسنا!!
والا بس المسألة مثل ما يقولون ( هبّة) جديدة؟
ليتكم تهبون في شي جائز ومفيد هذه مو هبه هذه هباب على قولة اخواننا في مصر
وكله كوم ولما يجيك شاب او بنت مسوين فيها نعومة وهم يسحبون معهم كلابهم بالشوارع !! لا يزينونها بالاكسسوارات !!! سلامات وين عايشين؟
يا جماعة الخير ترا تربية الكلاب في المنازل حرام شرعا ولا تجوز الا لغرض الصيد او الحراسة
عن ابو طلحة الأنصاري رضي الله عنه قال ((
سَمِعْتُ رَسولَ اللَّهِ صَلَّى اللهُ عليه وسلَّمَ يقولُ: لا تَدْخُلُ المَلائِكَةُ بَيْتًا فيه كَلْبٌ، ولا صُورَةُ ))
وقبل لا اقفل الموضوع انا أحمل الآباء والأمهات مسؤولية تقليد اولادهم وبناتهم للغرب وعدم اعتزازهم بدينهم وقيمهم .
أخيرا : مين اللي في بيتهم كلب؟