قصيدة للشاعر خالد المذعور



الرأي - مضواح بن شتوي - الرياض

عزم الطموح اللي تشبث فالامال
جته الظروف وضيعت عنفوانه

****

كم ذلت الدنيا طحاطيح وابطال
وكم خربطت عقل الثقيل التكانه

****
ملفى زوايدها على نقص واذلال
وعلى ملامحها تشوف الخيانه

****
دنياً تهز ملوك ورجال الاعمال
وكدادة التكسي وراع الديانه
****
الله ولاغيره يبدل فالاحوال
والناس ماتسقيك ربع استكانه

****
ولافيه مخلوقٍ رقد خالي البال
وهجس الظماير مالقي له حصانه

****
وقتٍ يماوحنا دوامات واشغال
ومراجعات المحكمه والامانه

****

وللبيت شغاله وللذود عمال
وفالمزرعه تبغى المكاين صيانه

****
الله يزيّنها على كل ابوحال
حتى البنوك بحاجة الاستدانه

****
لولا الخلا وملعلعة نجر وادلال
كتمت مثل الغاز فالاسطوانه

****
وصفرٍ لها في مهجة القلب منزال
ريحة عبسها ريحة الديدحانه

****
صفرٍ اليا قادت تهنفل تهنفال
يشدى نحيل ارقابها الخيزرانه

****
رق ورهاوة جنب وومايت اسبال
وراع النظر نسقه يهز اتزانه

****
ونزة عرنين تقل تقويست اهلال
وخدٍ عريضٍ مثل باب الخزانه

****
مالامني في حبها كل وبال
هي ونستي والناس كلٍ وشانه

****
والياسمعت اللي رفع سمعة بلال
صليت للي طمعتي في جنانه

****
اخضع براسي خوف تعضيم واجلال
لولا العباده مال لدنييا خانه

****
خالد المذعور


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *



ملاحظة : يمنع نشر أي تعليق بدون الاسم الصريح