الرأي - مضواح بن شتوي - الرياض  

الله من همنا اللي صار كبر الجبل
مدري على ويش ولا ليش متضايقين

حتى الرضيع الصغير لو دعيته جفل
قليل تلقى لك أسرة صح متفاهمين

أسبابها فتنة الدنيا وكثر الجدل
وأنماطنا اللي غزتنا من يسار ويمين

تسببت في فراق الاصدقا والاهل
وبعض الجمايع على ابسط شي متقاطعين

ليت الحكومة تسوي ساهر للزعل
ونظامها ماتجاوز سرعته الأربعين

وغرامته لو تجاوز صاحبه وانفعل
مليون ولا يدبل في الأصل مرتين

حتى تغيب الحماقة ويتلاشى الجهل
وإبليس مدحور بأمر الله مكبل اليدين

ويطيب للمجتمع وجه الرضا والقبل
ومؤشر الضغط والسكر لا بالله يزين

ونحاسب النفس قبل حسابها بالعمل
وحبل العلاقة مع رب الخلايق متين

و لا نضرّي فتوتنا لحب الكسل
و لانقول اطمعوا شي ماهو فرض عين

نبغى نكون المثل لآصار ضرب المثل
الاسلام منهاجنا والقدوة المسلمين

ياحي والله عين اللي يلم الشمل
ولايقود السفينة كون رجل فطين

اللي متونه تحمّل مثل حمل الجمل
لا دارت الدايره ماهو يبيح الكنين

يرسي لها لا بدا ماجوبها ما انخذل
هذاك اسميه طلق حجاج وأخطل يمين