اوصيك ياللي كل موضوع يشغلك
صبرك على ميلات وقتك شجاعه
****
اضحك و جامل و إنس هماً يزعّلك
دنياك ما تسوى الزعل منك ساعه
****
رد الجزا للي بقلبه يواصلك
قبل ايتبيّن من طرفك انقطاعه
****
رد الثنا للي بطيبه يجاملك
الطيب ما بين النشامى بضاعه
****
افعل جميل وبالتواضع تعاملك
ترى التواضع منزلك بالرفاعه
****
والكِبر عند اقرب قريباً يخذّلك
دخان صلفات الهبايب ضياعه
****
والعلم لبلوغ المعالي يوهّلك
والحلم خير كفيت شر الجزاعه
****
ليل الجهل داجي وحذرا يعرقلك
يثنيك بعقال الجمل في ذراعه
****
كثير بالدنيا اموراً تملّلك
تيّار غيضك لا يزود اندفاعه
****
حكّم ضميرك لا تضيّع دلايلك
خل الثقه بالنفس ستر و مناعه
****
لا تبدي اسرارك لخبلاً يغافلك
يزرع صعيبات المشاكل زراعه
****
لا تجادل اللي بالجهاله يجادلك
لو كان عندك بالكلام استطاعه
****
ان ضعت ميزان التجارب يعدّلك
التجربه مثل النهار و شعاعه
****
حسد الفقارى لأهل الصيت والملك
فيهم زرع فقر النفوس إبّشاعه
****
اللي خلقك بوافر الرزق كافلك
لا تنزعج ساس الغناة القناعه
****
إن اقبلت دنياك يجرّها السلك
تجيك من عقب العصايه بطاعه
****
وإن ادبرت بسيوف بقعا تذلّلك
تسقيك كاسات الشقا والشناعه
****
ان جاد حظك بالرفاعه ينزّلك
كلاً يبي قربك يجيك بوقاعه
****
و ان بار بك شفت الاهانه من اهلك
بك يشمتون المجتمع والجماعه
****
مهما جرى لك لا تضيّع مراجلك
اليسر عقب العسر يبني شراعه
****
عبدالله محمد الشمري
(
(
